ONGOONGO TUKU ATU (5 ‘Epeleli, 2020)

Na’e me’a atu e ongo Sea ‘o e Komiti Fakafonua ‘oku ne tokanga’i e ngaahi fakatamaki fakafokifa Hon. Poasi Tei mo e ‘Eiki Minisita Mo’ui Hon. Associate Professor ‘Amelia Afuha’amango Tu’ipulotu ‘o fakataha mo e Komisiona Pule e Ngaahi ‘Api Popula ‘a Tonga ni Semisi Tapueluelu ‘i he ‘Ulu’i ‘Apitanga e Ngaahi ‘Api Popula ‘a Tonga ‘i Hu’atolitoli ‘i he Tokonaki ‘aho 4 ‘Epeleli.

Na’e fakamalo’ia’i ai ‘e he ongo Minisita e taki lelei ‘a e Komisiona Pule e Ngaahi ‘Api Popula ‘i he ngaahi ngaue kuo fakahoko ke mateuteu ange pea mo malu’i e fanau hopoate lolotonga e taimi ‘oku mafola ai ‘i mamani e vailasi COVID-19. Na’e me’a ‘a Hon. Poasi Tei ki he ngaahi fakalakalaka lahi kuo lava ‘i he taimi nounou pe ‘i hono fakafehoanaki ki he’ene ‘a’ahi fakamuimui.

‘Oku kau heni e fokotu’u e ngaahi pesoni fanofano mo e tauhi e ‘apitanga ke ma’a mo malu ai pe.

Na’e fakaha ‘e he Komisiona Pule e Ngaahi ‘Api Popula ‘a ‘ene hounga’ia ‘i he me’a ange e kau taki mo e fakalotolahi ki he’enau fakahoko fatongia mo e kau ngaue.

Neongo e fengaue’aki vaofi ‘a e Potungaue Mo’ui mo e fanau hopoate he taimi kotoa pe ka ‘oku to e mahu’inga e ngaue fakataha he taimi ni ke mateuteu e ngaahi kupu kotoa pe ‘o e sosaieti.

Na’e kau atu ki he ‘a’ahi ‘a Dr. Reynold ‘Ofanoa, Dr. Pita Pepa pea mo Sela Fa’u mei he Potungaue Mo’ui fakataha mo e CEO ‘o e MEIDECC Paula Ma’u.

Like, Share or Print!: 

News Letter / Advertisements

vacancy