ONGOONGO TUKU ATU (15 ‘Epeleli, 2020)

'Oku fakamalo loto hounga 'aupito mo 'oatu 'a e faka'apa'apa lahi 'a e Potungaue Mo'ui koe'uhi ko e lava lelei e fakataha mo e Fakataha'anga Fakafonua e Kau Taki Lotu 'o Tonga pea mo e 'Eiki Minisita Mo'ui Hon. Associate Professor 'Amelia Afuha'amango Tu'ipulotu 'aneafi 'i Pasilika.

Na'e me'a foki ai e Kau Taki Lotu e Fonua pea mo e Sea ko e Palesiteni 'o e Siasi Tonga Tau'ataina Faifekau Semisi Fonua.

Na'e fakaha 'e he 'Eiki Minisita 'a e mahu'inga'ia 'a e Potungaue 'i he poupou 'a e kau taki lotu ke ma'opo'opo ange e ngaue pea mo hono lotua he 'oku mahino mai ko e malu'anga ia 'o Tonga.

Na'e feme'a'aki e kau Taki Lotu ki ha ngaahi founga ke fepoupou'aki ai ki he kaha'u mo e hoko atu hono ta'ota'ofi e faingamalie ke hu mai ai e mahaki fakamamanilahi ko e COVID-19.

Na'e me'a e 'Eiki Sea mo e Kau Taki Lotu 'o fakaha 'enau poupou talu pe mei he kamata hono fanongonongo mai pea mo 'enau loto ke fakaha 'enau 'ofa mo lotu ma'ae Pule'anga mo e fonua mo e laumalie fietokoni mei he Fakataha'anga Fakafonua e Kau Taki Lotu 'o Tonga.

Na'e me'a e 'Eiki Minisita 'o fakamalo ki he 'enau ngaue vave ke fakahoko e ngaahi tu'utu'uni ko e poupou ki he Potungaue Mo'ui pea mo e ngaahi lotu kotoa pe ma'ae fonua.

Like, Share or Print!: