ONGOONGO TUKU ATU (9 ‘Epeleli, 2020)

‘Oku hokohoko atu pe ‘a e ako ‘a e ni’ihi ‘oku nau ngaue he kau’afonua ke mateuteu ange lolotonga e to ‘a e mahaki fakamamani lahi ko e COVID-19. Lolotonga e teuteu e fonua ki he saikolone fakatalopiki ko Harold, na’e kei fai pe e ako ‘a e Potungaue Mo’ui pea mo e kau ‘ofisa Kasitomu ‘i he Mala’evakapuna Fua’amotu.

‘Oku mahino mai e fepoupouaki e ngaahi kupu fekau’aki he kau’afonua.

Na’e lava atu ‘a Dr. Reynold ‘Ofanoa ‘i he fatongia kehe pea ne to’o ai pe e faingamalie ke fakahoko e fakamalo mei he ‘Eiki Minisita mo e Potungaue Mo’ui ki he ngaue ‘oku fakahoko.
‘Oku mahino e mafatukituki honau fatongia koe’uhi ‘oku kei hao ‘a Tonga ni pea ko kinautolu ‘oku nau lototo’a kenau ngaue he kau’afonua.

Na’e fakamalo’ia’i foki mo e ngaue mahu’inga ‘oku fakahoko ‘e Sela Fa’u mo e timi mei he Potungaue Mo’ui ke fakapapau’i ‘oku fakahoko e ngaahi fatongia ‘i ha founga ke fakasi’isi’i ange ai e faingamalie ke hu mai ai e vailasi COVID-19 pea mo malu e kau ngaue he kau’afonua pea mo e ngaahi founga ngaue ‘e fakahoko ‘o kapau ‘e faifai pea a’u mai e COVID-19.

Na’e kau mai ki he ako ni mei Kasitomu ‘a Felefonu Mapakaitolo, Palolo Tupou, Melenaite Latu, Sione Tu’ivai, Sione ‘Ahio, Pauline Havealeta, Milika ‘Aukafolau, Taina Veamatahau, ‘Ana Selu, ‘Etuate Fakahua pea mo Sefili Fevaleaki.

Na’e lava atu mei he Potungaue Mo’ui ‘a Sela Fa’u, Uatesoni Tu’akava, Lesieli Mahe, Meleane Vainikolo, Malia Malani, Kalolaine ‘Eminoni, Molimoli Lotunofo, Ma’upese Mausia, Tavite Nasiio pea mo Narimba Talakai.